 |
 |
 |
UMI-XVI-2003 XVI Conferentia International de Interlingua Lovecz, Bulgaria 2003-07-26--08-02 | |
Bulgaria medieval | Bulgaria como parte del imperio turc | Le renascentia national de Bulgaria |
INTERLINGUA - UN NEUTRAL LINGUA COMMUN PRO LE PROSPERITATE DE NATIONES!
Le liberation de Bulgaria in 1877-78 (mille octo centos septanta septe a septanta octo) e le rolo de Finlandia in illo
Discurso per Allan Kiviaho, Finlandia
Lucta pro libertate de Bulgaria | Guerra Russia-Turchia 1877-78 comencia | Le armea russe attacca trans Danubio |
Le contracolpo de turcos | Le battalia de Lovecz | Le tertie battalia de Pleven
Le Guarda Finlandese | Le mobilisation | A Bulgaria! | Le battalia de Gorni Dûbnik | Le raid de sal a Lovecz
In aprilio 1876 in districtos Koprivsztitza, Panagjuriszte, Klissura e Strelcza 32 villages revoltava. Un de duces del revolta era Hristo Botev (1848-1876), poeta national de Bulgaria. Le 5 de maio 1876 ille capturava a Danubio le nave austrian "Radetzky" e disbarcava se con 250 patriotas al solo bulgare. Le 20 (vintesime) de maio ille cadeva presso a Vratza al montania Vola. Le represalias turc era cruel, circa 80 villages era destruite e 15 000 - 30 000 personas assassinate, feminas e viros de omne etates. Personas como Garibaldi , Turgenev , Victor Hugo , Oscar Wilde e protestava fortemente. William Gladstone , multiplice prime ministro de Britannia, scribeva un pamphleto con titulo "Bulgarian Horrors" e MacGahan , un jornalista american, scribeva in su reportos "Everywhere horrors, horrors, only horrors!"
LE GUERRA RUSSIA-TURCHIA 1877-78 COMENCIA In decembre 1876 sex grande potentias incontrava in Constantinopole pro arrangiar le question de nationes christian in le Imperio Turc. Secretemente incoragiate per Britannia Turchia declinava le protocollo concernente le 10 de aprilio 1877 e le 24 de aprilio Russia declarava guerra a Turchia.
Iste vice Russia habeva manos libere con Turchia quando in 1854-1856 quando Russia comenciava guerra contra Turchia, Britannia, Francia e Sardinia se alliava con Turchia. In plus le armea austrian in Siebenbürgen neutralisava operationes de Russia in Balkan. In 1877 Austria-Hungaria promitteva restar neutral e como contraprestation Russia permitteva lo occupar Bosnia-Hercegovina.
Jam in novembre 1876 Russia mobilisava 20 divisiones de infanteria e 7 de cavalleria.
Armea russe consisteva in 1877 48 divisiones de infanteria e 16 de cavalleria.
In 1876 Russia habeva in armas 720 000 soldatos, in novembre 1876 970 000, inter maio e augusto de 1877 le armea russe accresceva a 1 800 000 soldatos sed decresceva a causa de perditas e maladias a 1 500 000 soldatos.
Le population de Russia era quasi 100 000 000 habitantes.
In Turchia solmente le population moslem, ca. 19 000 000, era obligate al servicio militar. Formalmente Turchia era ancora un stato enorme, con omne su tributarios illo consisteva in Europa, Asia e Africa de plus quam 4 million kilometros quadrate con ca. 35 million habitantes.
Le armea turc consisteva ca. 500 000 soldatos, i.e. 1/3 (tertio) de illo de Russia.
Turchia in Balkan 1877 Serbia e Romania era tributarios de Turchia sed plus o minus independente. Montenegro era quasi- e Grecia totalmente independente sed multo plus minor quam hodie.
LE ARMEA RUSSE ATTACCA TRANS DANUBIO Durante le 14 e 30 novembre 1876 Russia mobilisava 20 divisiones de infanteria e 7 de cavalleria in 4 corpos de armea (VIII, IX, XI e XII) e transportava los al area de Kiszinev, Bessarabia (Moldova). Le transporto con 2000 trainos durava 50 dies. Iste "armea de operation" era cantonate durante 4 menses in Bessarabia.
Le supreme commandante del armea de operation era granprince (velikij knjaz) Nikolaj Nikolaevicz , 45 annos, le fratre del imperator.
Russia declarava guerra a Turchia le 24 de aprilio 1877 e le armea russe transpassava le frontiera romanian e turc. Le 26 3 additional corpo de armea (IV, XIII e XIV) era includite al armea de operation.
Le 26 de junio 1877 general Dragomirov transpassava Danubio a presso de Zimnitza in stilo de un operation de commandos.
Un ponte era constructe usque le 1 de julio e 4 corpos de armea marcheva al solo bulgare. Le "armea de operation" russe consisteva nunc 260 000 soldatos, reinfortiate con 30 000-40 000 soldatos del opûlczenie bulgare. Le armea turc consisteva de 280 000 soldatos in Balkan e Creta sed illo era disperse in parve gruppos in un area extensive.
General Gurko capturava con un brigada de infanteria, 3 brigadas de cavalleria e 4 druzhinas (battaliones, de 6 mobilisate) del opûlczenie bulgare e 40 pecias de artilleria Tûrnovo , le vetule capital de Bulgaria. Le granprincipe Nikolaj Nikolaevicz sequeva con VII corpo de armea. Con un manovra via le est general Gurko capturava le passo de Szipka, un placia strategic multo importante. Duo corpos de armea assediava Ruse e le XI corpo de armea capturava Nikopole le 13 de julio e prendeva 7000 - 8000 turcos a prisioneros.
LE CONTRACOLPO DE TURCOS
Le 13-19 de julio muszir (marechal) Osman Nuri pasza marchava ab Vidin con 12 000 soldatos a Pleven a ubi ille concentreva
16 000 - 18 000 soldatos. Le 20 de julio general russe Schilder-Schuldner attaccava le turcos con 10 000 soldatos sed era totalmente battite
(Le prime battalia de Pleven). Le 27 de julio le division (4000 soldatos) de Rifat Pasza occupava Lovecz (Le secunde battalia de Pleven) Le 30 julio general russe Krüdener con 26 000 - 28 000 soldatos attaccava Osman Pasza qui habeva 20 000 soldatos sed qui habeva energeticamente fortificate le area de Pleven. Le attacco falleva e le truppos russe se retirava 15-30 kilometros verso le est, partialmente in panico.
In iste duo prime battalias de Pleven le russos perdeva 9400 homines, le turcos solmente 1200.
Le 31 de julio Alexander II, le imperator russe, ordinava le mobilisation del optime unitates del armea russe, Le corpo del guarda (a qual pertineva Le guarda finlandese) e Le corpo de grenadieres.
Suleiman Pasza habeva luctate con successo contra le montenegrinos. Le 10 de julio le sultan ordinava que ille debeva arrivar con su truppos al fronte del sud con flotta que era inviate ab Istanbul a Antivari (Bar) in Montenegro. Le flotta disbarcava a Dedeagacz (Alexandrupolis) le 21 de julio e le 30 de julio le truppos de Suleiman Pasza se appareva a Stara Zagora. General Gurko era fortiate hastemente escappar retro a Tûrnovo.
LE BATTALIA DE LOVECZ A Lovecz occurreva le 3 de septembre 1877 un battalia inter le truppas russe de principe Imeretinski (27 513 officieros e soldatos e 98 pecias de artilleria) e le turcos sub Rifat Pasha, 7600 - 8600 homines, inter illes 2000 - 3000 circassianos e baszibokus (truppas irregular) e 6 pecias de artilleria. Malgrado su grande superioritate le corpo russe debeva comprar su victoria con un precio non basse:
Le russos perdeva 7 officieros e 335 soldatos morte, 39 officieros e 1245 soldatos ferite e 57 soldatos disparite, in toto 46 officieros e 1637 soldatos. Le perditas de turcos ha essite estimate a 2200 homines morte. Al battalia de Lovecz participava al minus duo finlandeses, caporal Matti Kuula e soldato Luhtanen. Caporal Kuula era ferite in iste battalia e inviate a casa.
LE TERTIE BATTALIA DE PLEVEN Le armea russe habeva concentrate a Pleven 85 000 soldatos (35 000 de illos romanianos) e 425 pecias de artilleria. Le truppos turc sub Osman Pasza consisteva de 30 000 - 35 000 soldatos e 70 pecias de artilleria. Le attacco, que debeva haber essite le decisive, comenciava a 14:30 horas le 11 septembre 1877.
Le russos poteva capturar alicun trencheas sed illes perdeva 12 000 homines e le commando supreme non voleva continuar le attacco le sequente die e le turcos poteva recapturar le positiones perdite e le russos perdeva ancora 3000 homines. Etiam le turcos suffreva perditas pesante.
Nunc le commando supreme del armea russe comprendeva que Pleven era capturabile solmente con un assedio regular. Commandante del truppos circum Pleven era Carol , le principe de Romania.
Como assistente del principe Carol era commandate general Totleben, un balto-germano (ex Latvia), como si tante officieros in le armea imperial russe, un grande specialista del guerra de fortificationes e un hero del defensa de Sevastopol. "Ille habeva plus grande confidentia in palas quam in bayonettas".
Post le infortunate 2e battalia de Pleven le 30 de julio 1877 9 divisiones de infanteria e 2 de cavalleria era mobilisate, inter illos Le Corpo del Guarda Imperial Organisation del Corpo del Guarda Imperial 1e Division de Infanteria del Guarda
general-tenente Conte Orlov-Davydov
1e Brigada - General-major Prince de Oldenburg
2e Brigada - General-major von Rauch
1e Brigada de Artilleria del Guarda de Corpo -
General-major Ovander2e Division de Infanteria del Guarda
General-tenente Czertkov
1e Brigada - General-major von Seddeler
2e Brigada - General-major von Rosenbach
2e Brigada de Artilleria del Guarda de Corpo -
Colonnello Sievers3e Division de Infanteria del Guarda
General-tenente Katalej
1e Brigada - General-major Filosofov
2e Brigada - General-major von Bremsen
3e Brigada de Artilleria del Guarda de Corpo -
Colonnello SaleriLe Brigada de Tiratores del Guarda de Corpore (Lejbgvardejskaja strelkovaja brigada)
General-major Ellis
1e Battalion de Tiratores del Guarda de Corpore -
Colonnello Ebeling
2e Battalion de Tiratores del Guarda de Corpore -
Colonnello Tenner
3e, Finnese, Battalion de Tiratores del Guarda de
Corpore / Henkivartiokaartin 3., Suomalainen,
Tarkk'ampujapataljoona / Livgardets 3., Finska,
Skarpskyttebataljon / 3e, Finskij, Lejbgvardejskij
Battal'on -
Colonnello, Baron Georg Edvard Ramsay
4e Battalion de Tiratores del Guarda de Corpore -
Colonnello Wassmund
2e Division de Cavalleria del Guarda
General-tenente Gurko
1e Brigada - General-major Kloth
2e Brigada - Major general Leonov
3e Brigada - General-major de Balmen
1e Brigada de Sappatores
Colonnello Seume
Le commandante del Guarda Finlandese era in 1874-1877 colonnello, baron Georg Edvard Ramsay (1834-1918). Ille era le commandante in chef del fortias armate finlandese in 1880-1901 (le armea finlandese era suspendite in 1901). Ille era promovite a general de infanteria in 1902. Su patre, general de infanteria, baron Anders Edvard Ramsay habeva essite le commandante del Guarda Finlandese (1829-32) e i.a. le commandante superior de omne truppos russe in Polonia.
Curiosemente, le Ramsays habitava in Munkkiniemen kartano (Casa Seniorial de Munkkiniemi, Helsinki), que deveniva plus tarde le stato major del KONE, un grande corporation multinational. Allan Kiviaho laborava in iste casa in 1975-82.
Le vicecommandante del Guarda Finlandese era in 1877 colonnello-tenente Julius K. Sundman (1828-93), colonnello-tenente 1874 (le plus juvene officiero del stato major 1874-80), suppletive commandante del Guarda Finlandese desde le 4 de novembre 1877 usque le 7 de januario 1878. General-major 1890.
Le commandante del Guarda Finlandese era desde le 8 de novembre 1877 (de facto ab le 10 de januario 1878) usque le fin del guerra colonnello Viktor Napoleon Procopé (1839-1906). Innobilite in 1883 - como sol Procopé - ille es nr. 262 in le Casa de Cavalleros (Riddarhuset) in Helsingfors/Helsinki. General-tenente 1889. Governator provincial e senator. Adjoint al secretario ministerial del stato in Sankt Peterburg 1891. Temporari ministro-secretario del stato pro Finlandia 1898-1900. General de infanteria 1900.
Armas heraldic de Procopé
Le officieros del Guarda Finlandese, photographate in 1878, post le guerra, per ordine special del Imperator Alexander II . In centro colonnello Viktor Napoleon Procopé, le sequente al derecta, colonnello-tenente Julius K. Sundman.
Tenente Karl Albert Fredrik Procopé qui faceva le celebre "raid de sal a Lovecz".
Georg Gustav von Winter (al sinistre), consilio ministerial e le medico in chef del Guarda Finlandese e Carl F. Wahlberg , le medico assistente. C.F. Wahlberg ha scripte (in svedese) le optime narration super le guerra Russia-Turchia 1877-78:
"Vid Lifgardets 3:dje finska Skarpskyttebataljon och Ryska Gardeskåren. FRÅN EN HÄRFÄRD I TURKIET 1877-1878. AF DR. C.F. WAHLBERG. HELSINGFORS, HUFVUDSTADSBLADETS TRYCKERI, 1878."Iste libro era classificate como raritate in le bibliotheca municipal de Helsinki sed duo dies ante nostre viage a Bulgaria io era permittite de prestar le libro post que io habeva exprimite que io intenderea pronunciar un discurso super iste guerra in Bulgaria.
A BULGARIA!
Le battalion era inspectate le 5 de septembre 1877 e le 6 de septembre a 07:00 horas le viage startava ab le station ferroviari de Helsinki.
Viage del Guarda Finlandese a Balkan e retro Le 11 de septembre le battalion usava in Bialystok (Don Gasper, un interlinguista eminente ex Hongkong, China, remarcava que in iste tempore in Bialystok viveva L.L. Zamenhof, le patre del esperanto) pro celebrar le die onomastic del imperator Alexander II, quando le armea russe faceva su assalto desperate contra Pleven suffrente perditas horribile. Le governator general de Finlandia, conte Adlerberg participava al festivitates e offereva un vitro de aqua ardente a soldatos. Le 18 de septembre le battalion celebrava su die annual in Chisinau e le 21 de septembre illo arrivava a Ungheni, un citate del frontiera russe-romanian.
A Ungheni le soldatos finlandese videva le prime vice lor inimicos veniente, captivate basziboszukes , soldatos irregular turc, multo cruel e multo timite ubicunque in Balkan. De Romania dr. Wahlberg scribeva: "Nos habeva bon tempore in Iaszi pro facer le cognoscentia de amabilitate de romanianos e vider probas de lor autoconscientia national, in Bucarest pro gauder de restaurantes meraviliore e audir novas de guerra." Le 28 de septembre le Guarda Finlandese arrivava a Fratesti e ab illo le viage continuava a pede. On comenciava audir le tonitro de cannones ab Pleven.
Le 3 de octobre 1877 le Guarda Finlandese transpassava Danubio sur le ponte que le pioneros russe habeva edificate de 1 de julio. Le banda de musica sonava un vetule marcha de cavalleria svedese, "Le marcha del Guerra de 30 annos".
Vamos reguarda le mappa del theatro de guerra.
Le guarda marchava le 5 de octobre a Gorna Studena ubi era le imperial stato major. Le imperator Alexander II personalmente salutava le Guarda Finlandese e guidava lo a su quartiero.
A 6 horas del 6 de octobre 1877 le guarda participava al servicio religiose e post isto le imperator inspectava le guarda post que le battalion startava su marcha verso Pleven in un forte pluvio. Le battalion debeva lassar le chaussee e continuar su marcha al longe de parve via que era un pappa de fango. Le 8 de octobre Carol I , le principe (plus tarde rege) de Romania e le commandante in chef de armea ante Pleven, veniva salutar le Guarda Finlandese a village de Borodino (Bogot?). Post isto le guarda marcheva a Ralevo e era solmente 16 kilometros a nord de Lovecz
Le 12 de octobre le guarda marchava a village de Yeni Barkatz (Beglezh?). Le 19 de octobre general Gurko veniva inspectar le guarda. Ille diceva al officieros del Brigada de Tiratores del Guarda de Corpore (Lejbgvardejskaja strelkovaja brigada), commandate de general-major Ellis: "Estimate seniores, como vos sape, su majestate ha ordinate me a commandante del truppos de guarda!" Al battalion finlandese ille diceva: "Io ha audite que vos finnos son tiratores excellente e que vos pote tirar mesmo aves volante. Assi il es nulle miraculo si vos pote colpar turcos qui solmente promena e curre. Senior baron (Colonnello Ramsay, le commandante del Guarda Finlandese), traduce isto a finnese, per favor!"
LE BATTALIA DE GORNI DÛBNIK Le russos e romanianos habeva perdite 47 000 soldatos in attaccos futile contra Pleven. Le commando supreme de russos habeva decidite que on debe fortiar Pleven a capitulation per famine. Pro isto il era necesse que le via ab Sofia a Pleven deberea esser secate. On deberea capturar le fortalessa de Gorni Dûbnik.
Un infanterista turc. Un adversario formidabile con su fusil excellente de Martini-Henry. Le majoritate del armea russe era armate con un fusil inferior, le Krnka. Le corpo de armea del guarda ( includente le Guarda Finlandese ) e le corpo de grenadieres era armate con un fusil moderne, le Berdan II, un construction american. Vide etiam information super le artilleria russe.
Soldatos del Guarda Finlandese
Supra es un designo original super le battalia de Gorni Dûbnik, designate per subtenente Alexander Sebastian Ehrnrooth (1852-1902), le officiero del ordinantia e "echelonnation" del battalion. Ille serviva in le Guarda Finlandese durante 1871-1899, participava al guerra inter Serbia e Turchia 1876, subtenente e officiero de messageros in le guerra 1877-78, tenente 1881 e representante de Finlandia al inauguration del monumento de battalia de Gorni Dûbnik, Bulgaria, colonnello 1897.Ab est attaccava le brigada de tiratores de general Ellis, le Guarda Finlandese al flanco sinistre. Ab west attaccava le Regimento finlandese (de facto illo era un regimento russe sed in iste regimento serviva alicun officieros finlandese como in plure altere unitates) e le Regimento de Pavlov.
Hjalmar Fredrik Nikolaus Procopé era mortalmente ferite al battalia de Gorni Dûbnik quando ille conduceva un gruppo de voluntarios in assalto contra un forte bastion de turcos. Le 24 de octobre 1977, le 100e anniversario del battalia de Gorni Dûbnik, un statua de colonnello H.F.N. Procopé era inaugurate con grande festivitates al campo de battalia. Plus information (etiam super general Lavrov, le monumento del Regimento finlandese etc.).
Gorni Dûbnik es capturate!
Aleksei Danilovicz KIVSZENKO (1851-1895)
Le Corpo del Guarda perdeva in le battalia del Gorni Dûbnik 17 officieros e 790 soldatos como morte e 94 officieros e 2384 soldatos como ferite. Le perditas del Guarda Finlandese non era multo pesante: 24 soldatos morite e 6 officieros (i.a. duo chefes de companias) e 94 soldatos ferite.
Officieros, subofficieros e banda musical del 3e (finnese) battalion de tiratores del Guarda de Corpore Russe in Bulgaria. Le 5e officiero ab leve in le prime linea es probabilemente colonnello Victor Napoleon Procopé, le commandante del battalion. Le 8e officiero ab leve in le 1e linea es colonnello-tenente Julius Sundman, le suppletive commandante del battalion inter le 4 de novembre 1877 a le 4 de novembre 1878. Le 3e officiero ab leve in le 2e linea es forsan tenente Sophus Christensen, Norvegia, qui accompaniava le battalion ab le 23 de novembre 1877.
LE RAID DE SAL A LOVECZ In Bulgaria le armea russe habeva serie problemas con approvisionamento. Le intendatura del armea imperial declarava que illo non plus pote fornir sal (un articulo multo importante in guerra e in particular in iste guerra, proque un grande parte de alimentos consisteva del carne de agno) a truppas. Tunc tenente Karl Albert Procopé , le intendente del battalion de Guarda Finlandese, organisava un "raid" a Lovecz a procurar un amonta sufficiente de sal que era transportate con le proprie carros del battalion de guarda. Iste incidento ha ganiate publicitate considerabile in le historia finlandese del Guerra 1877-78 in Balkan. Infortunamente le libros super iste guerra non da un narration exacte quando e como iste bravada de sal era execute. Pleven (P) era assediate per armea russe (le commandante de iste armea era prince Carol de Romania qui era assistite per general russe Totleben, un famose specialista del guerra de fortificationes e hero de Sevastopol). Le puncto rubie al sudwest de Pleven es Gorni Dubnik, un forte fortalessa, le captura de qual
secava de turcos le plus importante e ultime via a Pleven e hastava le cadita de illo. Le battalia de Gorni Dubnik era le battalia principal del Guarda Finlandese in iste guerra e un del plus celebre heroes era un colonnello finlandese, Hjalmar Fredrik Nikolaus Procopé, qui era mortalmente ferite in iste battalia. Le puncto blau representa le loco del intendentia del Guarda Finlandese e le X es le cruciata de vias per le qual le distaccamento de tenente Procopé probabilemente e possibilemente vadeva a Lovecz. Proque a Lovecz? Presumibilemente illac habeva essite magazines del armea turc (cf. le battalia de Lovecz). Il pare que le sal arrivava al Guarda Finlandese - post effortios enorme - solmente al "Montania Finlandese" (in le mappa un collina con le bandiera finlandese), quando le Guarda preparava se al attacco contra Sofia (S), le capital de Bulgaria. Interessantemente, quando nos, Allan e Brita-Lisa Kiviaho, presidente e secretaria del AFIL (Association Finlandese pro Interlingua) travaliava in autobus ab Varna al aeroporta de Sofia (evitante Lovecz), ubi nos incontrava le altere participantes del XVI conferentia international del UMI (Union Mundial pro Interlingua), nos videva insignos plure placias que era cognite de historias de Guerra 1877-1878. Nos viagiava per autostrada, le guardanos finlandese habeva superpassate le montanias de Balkan trans le terreno nivose trainante cannones.
Karl Albert Fredrik Procopé
(1848-1920). General-major.Karl Albert Fredrik Procopé nasceva 1848-04-08 a Virmo. Su patre era major Abdon Fredrik Procopé, administrator del posta a Borgå. Su matre era baronessa Agnes Jakobina Lybecker. Un pupillo in le schola de cadettos in Fredrikshamn 1859-1866. Fänrik in le 3e, finnese, battalion de tiratores del Guarda de Corpore. Subtenente 1870. Tenente 1874.
Participava como intendente del Guarda Finlandese al guerra Russia - Turchia 1877-78. Faceva in 1877 un celebre "raid de sal" a Lovecz. Medalios "pro braveria", "pro surpasso de Balkan", "pro distinction a battalia de Philippopel le 1878-01-03--05" e Cruce "Trecerea Dunarii" (Transpassato de Danubia).
1881 capitano del stato major. 1884 membro del committee pro le trainos e committee pro reglemento economic del battaliones de tiratores finlandese. Membro del committee pro depositos de unitates sanitari in occasion de mobilisation. Membro del supreme tribunal de guerra de Finlandia 1885-95. Colonnello 1895. 1896 commandante del 1e, nylandian, battalion de tiratores finnese. Al disbandamento de militaria finlandese al stato de deduction in 1902, homine de negotios 1903-18.
1918 durante le guerra de liberation in le armea blanc finlandese como colonnello, in 1920 retirava in rango de general-major.
Maritate le 1872-09-10 con Hedvig Elin Vendla von Törne (cuje patre era colonnello Johan Ulrik von Törne), 2 infantes. Su filio era Hjalmar J. Procopé, un famose homine de stato e fundator del Union Paneuropee de Finlandia.
Le granpatre maternal del matre de Hjalmar J. Procopé era colonnello-tenente von Törne, qui Johan Ludvig Runeberg, le poeta national de Finlandia (autor del anthema national de Finlandia), glorifica in su obra epic super le guerra russo-finlandese (1808-09):
In svedese:
Von Törne, vet du, var en äkta finne,
en gammal, knotig björk med masur inneIn finnese:
Von Törne oli mies suomalainen juurta juurevinta,
kuin vanha visarunko rustopintaIn interlingua:
Von Törne, sape tu, era un genuin finno,
un betula vetere, nodose; intra lupoide ligno
Actualisate le 2009-03-20
Administrator de iste sito:
--------------------------
Allan Kiviaho
SILY - Suomen Interlinguayhdistys ry.
FILF - Föreningen för Interlingua i Finland
AFIL - Association Finlandese pro Interlingua
