UNION PANEUROPEE - INTERLINGUA - FINLANDIA

C  = Coudenhove-Kalergi, Richard Nikolaus (1894-1972), fundator del Union Paneuropee H  = Habsburg, Otto von (1912-), presidente del Union Paneuropee 1972-2004 P  = Procopé, Hjalmar J. (1889-1954), fundator del Union Paneuropee Finlandese 1930 D  = Duggan, Stephen P. (-1950), le ultime presidente del IALA (International Auxiliary Language Association) G  = Gode, Alexander (1906-1970), le ultime director de recerca del IALA e le prime presidente del UMI M  = Martinet, André (1908-1999), le penultime director de recerca del IALA e un associato distinguite del UMI INDICE Union Paneuropee - Finlandia - Interlingua Universitate de Turku Union Paneuropee e Interlingua Un parve chronica del Union Paneuropee, Finlandia e Interlingua Estimate lector! Iste pagina non presenta opiniones official del Union Paneuropee, benque le signator es un membro del Section Finlandese del Union Paneuropee. Totevia, como presidente del AFIL - Association Finlandese pro Interlingua io crede que un lingua neolatin - INTERLINGUA - es le optime solution como un lingua commun pro cosas practic del Europa unite. Amicalmente Allan Kiviaho

Union Paneuropee - Finlandia - Interlingua Le historias del Union Paneuropee e INTERLINGUA ha plure tractos parallel.     In 1923 conte Richard Nikolaus Coudenhove-Kalergi poneva in Vienna le petra fundamental al Union Paneuropee, un movimento que jocava un parte remarcabile in le unification de Europa. In le mesme anno dr. Stephen P. Duggan era un de illes qui poneva in New York le petra fundamental al IALA, un organisation que creava in 1924-1951 per un immense cooperation de linguistas europee e american un international lingua neutral, INTERLINGUA, que pote devenir le lingua commun pro cosas practic del EUROPA UNITE.     In 1925 Coudenhove-Kalergi incontrava dr. Stephen P. Duggan (director del IIE - International Institute of Education), qui era appunctate le presidente del "American Cooperative Committee of the Pan-European Union".     In 1940 Le Union Paneuropee e le IALA emigrava ab Europa a New York, le previe chassate per GESTAPO e le postere per le bombas del LUFTWAFFE. Coudenhove-Kalergi e Stephen P. Duggan cooperava. Hjalmar J. Procopé era nominate le ambassador de Finlandia al Statos Unite in 1939. Le idea del Europa unite e le "cosa finlandese" (le Guerra Hibernal inter Finlandia e le Union Sovietic) non era recepte multo ben per le presidente Franklin D. Roosevelt - sed su sposa Eleanor R. habeva participate a un conferentia del IALA.     1945-, post le guerra le gravitate de activitates del Union Paneuropee e Interlingua retorna a Europa sed le cooperation transatlantic continua. Le nove presidente del SUA, Harry Truman e le secretario del stato, general George C. Marshall supporta le idea paneuropee. In 1953 le IALA era dissolvite. In 1955 Le Union Mundial pro Interlingua (UMI) era fundate in Tours, Francia, sed su prime presidente dr. Alexander Gode-von Aesch era un statounitese (nascite in Germania, su matre era un suissa) como su successor prof. Leland B. Yeager. Solmente le ultime duo presidentes del UMI, Jesper Olsson (1999-2001) e dr. Barbara Rubinstein (2001-) son europeos (Svedia). Universitate de Turku Le Universitate de Turku ha un rolo special in le historia del Union Paneuropee e INTERLINGUA in Finlandia. Professor André Martinet, un del patres de INTERLINGUA, era promovite le doctor h.c. in iste universitate (1970) como etiam le "grande vetere homine del Union Paneuropee" e un grande europeo, Archiduce dr. Otto von Habsburg (1995). Otto von Habsburg ha plure vices pronunciate discursos al Universitate de Turku e illac era publicate in maio 2002 le edition facsimile del original version finnese de 1930 del libro fundamental de Coudenhove-Kalergi, "PANEUROOPPA", per le Facultato de Lingua e Cultura Italian de iste universitate. Le director del facultato, professor Luigi G. de Anna es etiam le presidente del Section Finlandese del Union Paneuropee International. Union Paneuropee e Interlingua Conte Coudenhove-Kalergi supporta anglese como lingua commun pro Europa unite in su libro PANEUROPA: "In Paneuropa (como etiam in Panamerica) debe prevaler le principio del equalitate de omne linguas national sed de rationes technic omne statos europee deberea se decider a introducer le anglese como branca obligatoric, primo in su scholas secundari, tunc in su scholas elementari." Coudenhove-Kalergi presenta un condition re anglese: "... on debe totevia reformar su orthographia.". Un condition impossibile a realisar ... Coudenhove-Kalergi supporta anglese etiam in le edition finnese de 1930 de su libro ("PANEUROOPPA"): Esserea un grande avantagio a Europa, si su nationes poterea adaptar como branca in omne scholas elementari al latere del lingua maternal alicun lingua que servi le comprehension mutual. In prime loco como tal lingua veni a question anglese. Es remarcabile que Coudenhove-Kalergi non ha propagate pro anglese in su libros post 1930. Etiam remarcabile es que Coudenhove-Kalergi nunquam propagava pro Esperanto. Ille debe haber essite ben conscie de Esperanto, e.g. proque ab 1929 a Hofburg, le palatio imperial in Vienna, se trova le Museo International de Esperanto que hodie contine etiam material super Interlingua. In mesme palatio habeva loco etiam le stato major del Union Paneuropee. Proque conte Coudenhove-Kalergi travaliava pro Europa unite e Hofrat Hugo Steiner, le fundator del museo, pro un lingua commun, on pote esser certe que Hofrat Steiner propagava pro Esperanto como lingua commun de Paneuropa. Coudenhove-Kalergi ha se referite al Esperanto alicun vices:     "Le castello de Ronsberg era sovente visitate per diplomatos japonese. Un die in 1903 veniva le episcopo de Hakodate, un missionario francese. Heinrich C-K habeva invitate etiam le prestre de Ronsberg al castello. Al initio le discussion era inhabile proque le episcopo maestrava solmente francese e japonese, le prestre solmente czech e germano. Iste problema era tosto superate con le antiquissime "esperanto" del ecclesia catholic, le latino.     "Proque anglese es facile de apprender (on debe totevia reformar su orthographia) e pro su position medie inter le gruppos lingual germanic e romanic face lo al Esperanto natural."     Le libro fundamental de Coudenhove-Kalergi, PANEUROPA, era publicate in esperanto jam alicun annos ante que le Museo International de Esperanto era fundate. Interessante es le relation inter le Union Paneuropee e INTERLINGUA. Conte Coudenhove-Kalergi e dr. Stephen P. Duggan era proxime amicos e collaboratores, dr. Duggan presideva le "American Cooperative Committee of the Pan-European Union" in le Statos Unite ab 1925 e de novo ab 1940 quando Coudenhove-Kalergi e le movimento paneuropee era in exilio in New York. dr. Duggan era interessate super le linguas auxiliar jam ante le IALA (International Auxiliar Language Association), que creava INTERLINGUA, era fundate in 1924. dr. Duggan era un membro del IALA usque su morte in 1950, su tertie e ultime presidente durante 1940-50, in le phase decisive quando le INTERLINGUA era complite. Ben que IALA non habeva originalmente intendite construer su proprie lingua auxiliar, illo comenciava cambiar su position post circa 1934, quando le convenientia de alicunque del linguas investigate currentemente deveniva de plus in plus dubitose. De importantia special esseva le argumentos si on debeva preferer un lingua naturalistic (como Occidental) o un lingua schematic (como Esperanto o Ido). On teneva reuniones pertinente a Geneva in 1935 e a Copenhagen in 1937, ubi - al grande surprisa del mundo interlinguistic - esperanto era toto abandonate. Jam in 1937 le recercas del IALA veniva al conclusion que pro elaborar un lingua scientificamente e impartialmente, on debeva extraher lo completemente ab le linguas natural. Il es ultimemente improbabile que dr. Duggan non haberea discutite con Coudenhove-Kalergi super le question de un lingua neutral pro Europa unite. Sed Coudenhove-Kalergi non ha tractate iste question in su libros. Proque non? Le phase final del developpamento de Interlingua occurreva in 1946-51 quando le chefes de recerca del IALA, prof. André Martinet e dr. Alexander Gode dava le ultime mano al Interlingua, Coudenhove-Kalergi habeva jam retornate a Europa. De facto le nove lingua neolatin que le IALA habeva sub developpamento era pro le prime vice appellate INTERLINGUA in 1946. Pro le momento le interlinguistas non sape que pensava Coudenhove-Kalergi de Interlingua. Il esserea comprensibile que ille non poteva publicamente supportar un lingua que esserea un rival de anglese, ille era ja un professor al Universitate de New York e le stato major del Union Paneuropee in exilio habeva loco in mesme universitate, ille discuteva super le futuro de Europa con plure eminentias american, includente presidente Harry Truman e general G.C. Marshall e collaborava con Winston Churchill re le Europa unite. Sed il pote etiam esser symptomatic que ille non propagava pro anglese post le 1930s (in tanto que le interlinguistas sape). A proposito, Winston Churchill era interessate de Basic English, un version supersimplificate de anglese, cuje creator era professor C.K. Ogden in 1932. Prof. Ogden habeva participate etiam in conferentias del IALA. Le archivo extensive (documentos desde 1924) del IALA que era trovate 1997 in New York e es nunc in le New York Public Library pote esser un fonte interessante re le relationes inter le Union Paneuropee e Interlingua (correspondentia inter Coudenhove-Kalergi e Stephen P. Duggan). Sperabilemente alicun interlinguista newyorkese va facer studios con le archivo. Le archivo del Union Paneuropee in Vienna era confiscate per le GESTAPO e Joseph Goebbels in 1938 e transportate a Berlin, ab qual le officiales sovietic possibilemente (si non probabilemente) lo transportava a Moskva post le secunde guerra mundial. xxx Archiduce Otto von Habsburg, le currente presidente del Union Paneuropee, es fluente in multe linguas. Ille ha scripte plure articulos super questiones lingual. Ille se oppone le hegemonia del anglese in Europa e ha scripte i.a.: "Latein ist treffsicher wie ein Kugelgewehr - Englisch streut wie Schrot!" ("Latino es precise como un fusil - Anglese disperge como escopeta!") [Die Zeit 1999:25] Un parve chronica del Union Paneuropee, Finlandia e Interlingua 1925 Coudenhove-Kalergi faceva un tournee al Statos Unite de America. Era fundate le "American Cooperative Committee of the Pan-European Union", dr. Stephen P. Duggan (director del IIE - International Institute of Education) como presidente. 1929 Coudenhove-Kalergi invitava Hjalmar J. Procopé al Committee honorari del Union Paneuropee. Illes habeva incontrate plure vices in Geneva al Liga de Nationes (Procopé habeva acte i.a. como presidente del 9e conferentia general del Liga de Nationes). 1930 Hjalmar J. Procopé fundava le section finlandese del Union Paneuropee. Le edition finnese del libro PANEUROPA es publicate. 1936 Otto von Habsburg deveniva membro del Union Paneuropee. 1938 ANSCHLUSS - Germania occupa Austria. Coudenhove-Kalergi pote a pena escappar via Slovachia, Hungaria, Yugoslavia e Italia a Suissa. GESTAPO publicava un mandato de arresto super Otto von Habsburg. Coudenhove-Kalergi incontrava le prime vice Winston Churchill. 1939 Hjalmar J. Procopé arrivava al Statos Unite como ambassador. Coudenhove-Kalergi laborava in Paris pro le governamento de Austria in exilio. Ille incontrava le archiduce Otto von Habsburg. 1940 Coudenhove-Kalergi e Otto von Habsburg emigrava al Statos Unite. Le stato major del Union Paneuropee era cambiate ab Bern (Suissa) al Universitate de New York. Le stato major del IALA era cambiate ab Liverpool (Grande Britannia) a New York. Coudenhove-Kalergi demandava dr. Stephen P. Duggan de novo convocar le "American Cooperative Committee of the Pan-European Union", que C-K habeva fundate ante 16 annos sub presidentia de Stephen P. Duggan. Desde isto illes organisava sessiones periodic e multe influential statouniteses se inrolava al committee. Stephen P. Duggan era appunctate le 3e e ultime presidente del IALA, al periodo quando INTERLINGUA era affinate. 1940-1944 Hjalmar J. Procopé essayava acquirer armas pro Finlandia que faceva un guerra desperate contra le Union Sovietic (Le "Guerra Hibernal" 1939-40). Le presidente del Statos Unite, Franklin D. Roosevelt non era multo sympathetic pro le cosa de Finlandia (su sposa Eleanor habeva participate a un conferentia del IALA). In 1941-44 (durante le "Guerra Continuante") Procopé habeva un carga non invidiabile proque le relationes inter Finlandia e le SUA se continualmente deteriorava e al fin se secava. Otto von Habsburg narrava in Turku in maio 2002 que ille habeva incontrate Hjalmar J. Procopé alicun vices in le SUA durante le guerra. Coudenhove-Kalergi e Otto von Habsburg laborava pro le Union Paneuropee e Otto von Habsburg etiam pro adjuta a Austria. Presidente Roosevelt non era enthusiastic super le idea de un Europa unite sed su successor Harry Truman e general George C. Marshall calidemente supportava Coudenhove-Kalergi e Otto von Habsburg. 1943 Le 5e congresso paneuropee in New York sub auspicio del Universitate de New York. Le inauguration del conferentia habeva loco in le grande sala de ballo del Hotel Waldorf-Astoria. Le presidente del inauguration era William C. Bullitt, le ex-ambassador del SUA in le Union Sovietic e Francia. Rector Chase diceva pro le universitate e Stephen P. Duggan pro le Committee Europee de America. Bullitt era etiam un bon amico de Hjalmar J. Procopé. Post le guerra Procopé traduceva le libro "The Great Globe" de Bullitt a svedese. 1946 Le IALA invitava dr. André Martinet ex Sorbonne a New York e confideva a ille le direction de su recerca interlinguistic. Le producto del IALA era pro le prime vice appellate INTERLINGUA. 1948 André Martinet se jungeva al Universitate de Columbia. Ille era succedite per Alexander Gode-von Aesch como director del recerca del IALA. 1950 Le obra del vita del conte Richard Nikolaus Coudenhove-Kalergi obteneva un recognoscentia grandiose quando a ille era le como prime persona assignate le Premio del Carolo Magne del citate Aachen. Le "Sacre Imperio Roman" de Carolo Magne era le prime predecessor del Union Europee cuje frontieras astonantemente correspondeva los del prime version del Union Europee - Aachen/Aaken/Aix-la-Chapelle/Aquae era su capital. Le festa del premio del Carolo Magne comenciava in le mesme cathedral ubi Carolo Magne ipse habeva precate e ubi ille es sepelite. Ab illo on vadeva al Kaiserpfalz ubi 34 imperatores del Sacre Imperio Roman era coronate. Le tractato de Roma inter Francia, Germania, Italia e le statos Benelux era le prime passo in le realisation del Union Europee. 1951 INTERLINGUA era complite post extensive labor international durante 27 annos. Alexander Gode declarava que "Interlingua non es un nove lingua artificial sed un lingua natural sin essente un lingua national". 1952 Reconciliation inter le Union de Parlamentaricos Europee ( Coudenhove-Kalergi) e le Movimento Europee (Winston Churchill e Duncan Sandys). Le prime session mutual de iste organisationes habeva loco in Paris, in le palatio presidential del assemblea national in Paris, sub presidentia de Edouard Herriot. Alicun dies postea incontrava in Luxembourg le session general del Movimento Europee sub presidentia de Paul Henri Spaak. Konrad Adenauer, Winston Churchill, Alcide de Gasperi, Robert Schuman, Paul Henri Spaak e conte Richard Coudenhove-Kalergi era nominate presidentes honorari del movimento, Coudenhove-Kalergi como sol persona private, omne alteres era ex-prime ministros. 1955 Le 1e Conferentia International de Interlingua in Tours, Francia, ubi Le Union Mundial pro Interlingua (UMI) era fundate, Alexander Gode-von Aesch como su prime presidente. 1957 Pacto de Roma. Le mercato commun europee e le Euratom era fundate. Coudenhove-Kalergi scribeva: "Le Rubicon es transpassate! Le via es nunc aperte al Statos Unite de Europa!". 1970 Professor André Martinet era promovite doctor h.c. al Universitate de Turku, Finlandia. Le universitate faceva 50 annos. 1972 Le propheta e pionero del Europa unite, conte Richard Nikolaus Coudenhove-Kalergi moriva. 1973 Archiduce Otto von Habsburg le presidente del Union Paneuropee International. 1991 Otto von Habsburg era informate super le avantages de INTERLINGUA per professor Július Tomin, Czechoslovachia. Le responsa de Otto von Habsburg: "... per le phrase scripte in interlingua io conclude - il se tracta de catalano, que io ama, proque illo es si proxime al latino". 1995 Otto von Habsburg era promovite doctor h.c. del Universitate de Turku, Finlandia. Le Union Paneuropee retornava a Finlandia. In connexion del affilamento de spadas doctoral como parte del seremonias promotional in le Universitate de Turku archiduce Otto von Habsburg signava le documento de fundation del Circulo de Amicos Paneuropee in Turku. In 1996 le circulo se expandeva al Section Finlandese del Union Paneuropee International cuje presidente era selecte Luigi G. de Anna, professor de lingua e cultura italian al Universitate de Turku. 1998 Professor André Martinet era appunctate in etate de 89 annos le tertie membro distinguite del UMI. 2002 In iste anno jubilari - le movimento paneuropee 80 annos e le Archiduce Otto von Habsburg 90 annos - in Finlandia era publicate un edition facsimile del version finnese (1930) del libro fundamental de Richard Coudenhove-Kalergi: PANEUROOPPA. Le libro, redacte per docente Eero Kuparinen, era presentate in le departemento de manuales del Bibliotheca Municipal de Turku. Le archiduce e presidente del Union Paneuropee International, dr. Otto von Habsburg e su filia archiduchessa dr. Walburga von Habsburg Douglas veniva a Turku pro celebrar le occasion. Archiduce von Habsburg ha scripte un capitulo al nove edition e ille personalmente signava multe exemplares del libro. Le nove edition era inaugurate in maio 2002 per Otto von Habsburg al Universitate de Turku - ubi ille ha essite promovite le doctor honoris causa in 1995. Otto von Habsburg etiam pronunciava un discurso super le futuro del Europa unite. 2002 novembre. Le presidente del Union Paneuropee desde 1973 e un membro del Parlamento Europee 1979-1999, archiduce Otto von Habsburg 90 annos. Grande festivitates in Vienna e plure altere urbes in Europa.     Dr. Jeanne Martinet, la vidua de professor Martinet era appunctate la presidente del UIF - Union Interlinguiste de France. 2003 julio. UMI-XVI-2003, le 16e conferentia international del UMI era arrangiate in Lovecz, Bulgaria. In 1877 tenente Karl Albert Procopé, le intendente del battalion de Guarda Finlandese, organisava un "raid" a Lovecz a procurar un amonta sufficiente de sal que era transportate con le proprie carros del battalion de guarda. Tenente (general in le armea finlandese post que Finlandia habeva devenite un stato independente) Karl Albert P. era le patre de Hjalmar J. Procopé. Actualisate le 2006-11-26 Administrator de iste sito: -------------------------- Allan Kiviaho SILY - Suomen Interlinguayhdistys ry. FILF - Föreningen för Interlingua i Finland AFIL - Association Finlandese pro Interlingua Kivimäentie 16 E. FIN-01620 VANTAA. Finlandia